په غزه کې بشري بحران ژور شوی؛ له یو میلیون زیات فلسطینیان عاجلو مرستو ته اړ دي

ملګرو ملتونو اعلان کړی چې د اسراییل او فلسطین ترمنځ د اوربند تر اعلان وروسته هم په غزه کې له یو میلیون څخه زیات اوسېدونکي د عاجلو بشري مرستو ته اړتیا لري.

د دغه سازمان د تازه راپور له مخې، ډېری کورنۍ چې د جګړې له امله بې‌کوره شوې وې او اوس خپلو ویجاړ شوو سیمو ته ستنې شوې دي، د خوراکي توکو، پاکو اوبو او نورو لومړنیو اړتیاوو له سخت کمښت سره مخ دي.

راپور زیاتوي چې د جګړې او اوږدې محاصرې له امله، اوسېدونکي د خوړو، درملو او څښاک اوبو له نه شتون سره لاس او ګرېوان دي. د مرستو رسونه د امنیتي خنډونو او لوژستیکي ستونزو له کبله په ډېرو سیمو کې له ځنډ او محدودیت سره مخ ده.

ملګري ملتونه خبرداری ورکړی چې که عاجلې مرستې ژر ونه رسیږي، د بشري وضعیت د لا خرابېدو امکان ډېر دی. دغه بنسټ له نړیوالې ټولنې، بشري موسسو او مرستندویه ادارو وغوښتل چې د خلکو د ژوند ژغورنې لپاره ګډې او چټکې هڅې وکړي.

سره له دې چې اوربند د جګړې د بندېدو نښه بلل کېږي، خو د خلکو د عادي ژوند بېرته راګرځول لا هم له جدي ننګونو او اوږدې بیارغونې سره تړاو لري. د غزې د بشري بحران دوام د نړیوالې ټولنې لپاره د ژورې اندېښنې وړ بلل شوی دی.