د افغانستان لپاره د چین ځانګړي استازي د بهرنیو چارو وزارت له مالي او اداري مرستیال سره په لیدنه کې ویلي چې چین له افغانستان سره د اوږدمهاله او پر متقابل احترام ولاړو اړیکو د پیاوړتیا هیله لري او د دغه هېواد د ملي حاکمیت او ارزښتونو درناوی کوي.

د بهرنیو چارو وزارت نن په یوه خبرپاڼه کې لیکلي چې د سرپرست حکومت د بهرنیو چارو وزارت مالي او اداري مرستيال دوکتور محمدنعیم د افغانستان لپاره د چین له ځانګړي استازي یوشیاو یونګ سره وکتل.

خبرپاڼه کې راغلي چې په دې کتنه کې د دوه اړخیزو موضوعاتو او اړيکو ترڅنګ د افغانستان او پاکستان ترمنځ پر وروستي کړکېچ بحث وشو.

محمدنعیم ویلي، چین او افغانستان دوه تاريخي ګاونډي هېوادونه دي چې ډېر مشترکات سره لري او نوموړي د چين هېواد د ملاتړه له امله مننه کړې ده.

هغه زیاته کړې چې د افغانستان سرپرست حکومت له ټولو هېوادونو سره د متقابلو اړيکو پر بنسټ  تعامل ته ژمن دی او هيچا ته اجازه نه ورکوي چې د افغانستان خاوره د نورو پر ضرر وکاروي.

نوموړي ویلي: «متاسفانه پاکستان له تېرو څلورو کلونو راهیسې د اسلامي امارت حوصله ازمايي؛ تر دې چې اسلامي امارت عکس‌العمل ته اړ ايستل شو، د اسلامي امارت ثابت موقف دا دی چې د ستونزو حل او هواری په خبرو او تفاهم کې دی».

سرچینې لیکلي، په دې کتنه کې د چین استازي یوشیاو یونګ ویلي، چین له افغانستان سره د اوږدمهاله او پر متقابل احترام ولاړو اړیکو د پیاوړتیا هیله لري او د دغه هېواد د ملي حاکمیت او ارزښتونو درناوی کوي.

نوموړي زیاته کړې، چین هڅه کوي چې د افغانستان او پاکستان ترمنځ د شخړو د حل لپاره رغنده رول ولوبوي او په دې لړ کې د قطر او ترکیې د منځګړیتوب هرکلی کوي.