د مطالعې ارزښت
لیکوال: ولی محمد ستانکزی
مطالعه د انسان د فکر، پوهې، نړۍ لید او شخصیت د جوړولو لپاره یو له بنسټیزو اړتیاوو څخه ده. انسان هغه وخت له خپل محیط سره ژوره او ماناداره اړیکه نیولی شي چې د مطالعه کولو عادت ولري. مطالعه یوازې د کتابونو پاڼې اړول نه دي، بلکې د ذهن لپاره د تنفس او د روح لپاره د ودې لار ده. کله چې انسان کتاب لولي، نو د زړه د نړۍ کړکۍ پرانیستل کېږي او د فکر نوې دروازې ورته خلاصیږي. د مطالعې په پایله کې انسان نه یوازې معلومات زیاتوي، بلکې د خپل ځان او چاپېریال په هکله ژوره پوهه تر لاسه کوي. همدارنګه، مطالعه د انسان په فکري ځواک، تحلیل، پریکړه کولو او د حقیقت پېژندلو په وړتیا کې مهم او لازمي رول لري.
مطالعه د انسان په شخصیت کې داسې مثبت بدلونونه رامنځته کوي چې په ورځني ژوند، اړیکو، چلند او خبرو کې یې اغېزې څرګندېږي. هغه څوک چې مطالعه کوي، د خبرو په کولو کې سنجیده وي، د خلکو په درک کې لوړه وړتیا لري او په ټولنه کې د ښه چلند خاوند ګڼل کېږي. کله چې انسان مطالعه کوي، نو د تجربو هغه نړۍ ته داخلېږي چې نورو انسانانو په کلونو کې تجربه کړې وي، او هغه تجربې په څو ساعتونو کې د کتاب له لارې لوستونکي ته انتقالېږي. همدا د مطالعې ځواک دی چې انسان ته د ژوند، تاریخ، ساینس، اخلاقو، اقتصاد، هنر او نورو اړخونو په اړه پراخ نظر ورکوي.
سړی چې مطالعه کوي، خپل ذهن له ناپوهۍ، محدودیت او تورو کونجونو څخه خلاصوي او د رڼا، پوهې او لید د پراخوالي پر لور یې بیایي. د انسان فکر هغه وخت وده کوي چې ذهن یې له موادو ډک شي، او دغه مواد د مطالعې له لارې ترلاسه کېږي. مطالعه انسان ته ځواک ورکوي چې په هر حالت کې د خپلې منطقي پوهې له مخې پرېکړه وکړي او د چاپېريال له فشارونو سره د درک او تحلیل پر اساس مقابله وکړي. کله چې انسان مطالعه ونه کړي، نو ذهن یې د نورو د خبرو تابع پاتې کېږي او خپلواکه فکري ځواک نه شي لرلی. خو هغه څوک چې د مطالعې عادت لري، خپل فکر لري، خپل تحلیل لري او د هرې مسلې په هکله د نظر وړتیا لري.
مطالعه د انسان شخصیت نه یوازې فکري کړي، بلکې عملي برخې یې هم پیاوړې کوي. کله چې انسان کتاب لولي، نو د نورو خلکو تجربې، ستونزې او بریاوې پرې اغېزه کوي. انسان د مطالعې له لارې د ژوند د مدیریت لارې چارې زده کوي، د وخت د تنظیم مهارت ترلاسه کوي او د ستونزو په حل کې د نوښت وړتیا پیدا کوي. د مطالعې لویه ګټه دا ده چې سړی د هغو حالتونو لپاره هم تجربه ترلاسه کوي چې تر اوسه یې په ژوند کې نه دي تجربه کړي. داسې څوک چې مطالعه کوي، د ژوند له پېښو څخه دومره نه وېرېږي، ځکه ذهن یې مخکې له مخکې د ورته حالاتو لپاره پوهه او تجربه لري.
مطالعه د انسان د اخلاقو په جوړولو کې هم مهم رول لري. هغه کتابونه چې د اخلاقو، تاریخ، ژوند لیکونو او انساني ارزښتونو په اړه لیکل شوي وي، د لوستونکي په روح کې ژور تاثیر کوي. کله چې انسان د لویو شخصیتونو د ژوند او کړنو په اړه مطالعه کوي، نو د هغوی ښو عملونو یې په ژوند کې بدلون راولي. مطالعې د انسان دنننۍ نړۍ ته داسې درک ورکوي چې د ځان اصلاح ته هڅوي او په ټولنه کې د ښه عمل سبب کېږي. بې له مطالعې انسان یوازې د خپل محدود چاپېريال له تجربو زده کړه کوي، خو مطالعه یې د نړیوالو تجربو له بحره برخمنوي.
مطالعه د ذهن د تمرین لپاره هم تر ټولو غوره وسیله ده. لکه څنګه چې د بدن ځواک د ورزش له لارې لوړېږي، همداسې د ذهن ځواک د مطالعې له لارې ډېرېږي. ذهن چې بې کاره پاتې شي، کمزوری کېږي، خو د مطالعې له لارې نه یوازې فعال ساتل کېږي، بلکې د یادښت، تمرکز، تحلیل او د فکر د سرعت وړتیا هم لوړوالی مومي. هغه انسان چې مطالعه کوي، په خبرو کې قوي دلیل وړاندې کوي، په لیکلو کې نرمي او رواني لري او د هر بحث په اړه یو منظم او واضح فکر وړاندې کوي.
مطالعه نه یوازې د لویانو لپاره اړینه ده، بلکې د ماشومانو او ځوانانو لپاره یې ارزښت څو برابره ډېر دی. هغه ماشومان چې له وړوکتوبه د کتاب سره بلد شي، د فکر په وده، د ژبې په زده کړه، د اخلاقو په جوړېدو او د ښوونې په پرمختګ کې ډېره بریا لري. په همدې ډول هغه ځوانان چې په زده کړو ترڅنګ مطالعه کوي، د ژوند په عملي ډګر کې تر نورو ډېر بریالي وي، ځکه مطالعه یې د فکر افق پراخ کړی وي او په ستونزو کې د مناسبې پرېکړې وړتیا ورکوي. د مطالعې نه لرل د ځوان نسل لپاره یو له سترو خلاوو څخه دی، ځکه د ټکنالوژۍ په دې عصر کې ډېری وخت انسان په داسې بوختیاوو کې غرق شي چې ګټه یې کمه او زیان یې ډېر وي، خو مطالعه ذهن د بې ځایه بوختیاوو څخه ژغوري او پر ګټورو لارو یې بوختوي.
مطالعه د ټولنې د پرمختګ لپاره هم خورا مهمه ده. هغه ملتونه چې د مطالعې کلتور لري، د پرمختګ په ډګر کې تل مخکې وي. کله چې خلک مطالعه کوي، د سیاست، اقتصاد، ټولنیزو چارو، کلتور او نورو برخو په اړه سمه پوهه پيدا کوي، او هماغه پوهه یې د ټولنې په پرمختګ کې مرسته کوي. ټولنه هغه وخت پرمختګ کوي چې وګړي یې پوهه ولري، او پوهه د مطالعې له لارې ترلاسه کېږي. بې له مطالعې ټولنه د معلوماتي کمزورۍ ښکار کېږي، د شایعاتو، غلطو خبرونو، ناسم تحلیلونو او ناسمو پرېکړو اغېز پرې ډېر وي. خو مطالعه د دې ټولو ستونزو مخه نیسي، ځکه چې ذهن د حقیقت د پیژندلو وړتیا ترلاسه کوي.
مطالعه د انسان د ژوند، فکر، اخلاقو، شخصیت او ټولنیز پرمختګ لپاره تر ټولو مهمه اړتیا ده. انسان چې مطالعه کوي، خپل ذهن او روح ته وده ورکوي، د خپل ژوند په هره برخه کې بریالي کېږي او په ټولنه کې یو فعاله او اغېزمن غړی ګرځي. مطالعه د انسان د خلاصون، پرمختګ، رڼا او پوهاوي لار ده. هر څوک چې غواړي بریالی، پوه، باادبه او بافکره انسان وي، باید مطالعه خپله ورځنۍ او مهیمنه برخه وګرځوي. که هر انسان یوازې لږ وخت هم مطالعه ته ځانګړی کړي، نو د هغه ژوند بدلېږي، فکر یې پراخېږي او د نړۍ په اړه یې لید روښانه کېږي. مطالعه د انسان تر ټولو ښه ملګری دی او هیڅ شی د هغې ځای نه شي نيولی.
